El ‘Roscopo prima e dopo le Feste de Nadal                 (Dic.2019 – Gen. 2020)

‘RIETE: No vedè l’ora de ciapar la tredicesima per brusarla! ‘Tenti però, che novo governo ga zà tuto programà; in genaio aumenti in quantità! Ma voi no bazilè! Nadal xe ‘na volta l’ano! AMOR: se lo farè per l’ultimo de’l’ano, sarà bon per tuto l’ano! SALUTE: prima de le feste sarè stitici e dopo le feste sarè ‘ssai statici, ma sul condoto! ‘Tenti a le lentichie? LAVOR: gnanca in nero (par via de la quota 100)! BORI: voi solo savè quanti che gavè! COLOR: zalo spudacia! ZOGO: scova in 15.

 

TORO: Nonostante che se ‘bastanza ‘tenti, i corni no ve li cava nissun, anzi! – Soto le feste, no ste sbilanciarve tanto co’l taquin, sia per i regali che per ofrir un caliceto!  – Spinaze! AMOR: se no rivè felo magari co’l pensier! SALUTE: dopo vinti ani che se in pension, no podè lamentarve! LAVOR: al dancing Paradiso i zerca camerieri con esperienza per l’ultimo de’l’ano! BORI: brazeto curto no tien più de un bicer! – Spinaze! COLOR: verde biso. ZOGO: ciaperè l’oto (‘ndarè a Roian)

 

ZEMEI: Un de qua, un de là! Spetarè che qualchedun ve inviti al pranzo de Nadal! Co la crisi che xe, el moto che disi: “Nadal co’i tui e Pasqua con chi che te vol”, no ‘sisti più! AMOR: ciaperè un bidon per l’ultimo! La vostra amante ve molerà per ‘n’altro! Per ‘na question de privacy, no ve digo come che resterè! SALUTE: ve pesarè prima de le feste, e dopo? Xe meio de no! LAVOR: no far fadiga per gnente! BORI: tireli fora de la banca prima che ‘sto governo ve ciuci quei do euri che gavè messo in taio! COLOR: blu de russia. ZOGO: xe meio de no’sto mese!

 

CANCRO: Mi zà so prima, quel che ve xe sucederà durante le feste, ma per ‘na question de privacy no voio anticiparve, perché se nò, no saria ‘na sorpresa! Sicome gavè cocola taverneta, per Nadal, amici e parenti volerà esser invitadi de voi, ma, troverè ‘na bona scusa, che no posso dirve perché no son spion! AMOR: el vostro patner sarà ‘ssai contento; voi no! De cossa savè solo voi! SALUTE: prosit! LAVOR: de piturar la taverneta no se ghe ne parla! BORI: zogherè tre numeri al loto 32-51-48! COLOR: magenta. ZOGO: el frate ga perso……..

LION: Anca voi no vedè l’ora che rivi Nadal per star un’poco in familia. Se lavorè se stanchi, se, sè in pension se stufi. Mai contenti! AMOR: l’inverno sta rivando e sentì el bisogno de tanto calor! Buterè via la vecia stùa a cherosene e meterè una a legni. Ve senterè co’l vostro patner vizin al fogo, e ve varderè ne i oci. Altro no posso dir! Auguri! SALUTE: ‘Sto ano passà la ve xe ‘ndada ben! LAVOR: vaben che se 31 ani in pension, ma fe almeno l’albero co’le bale! BORI: no servi che li metè in taio! COLOR: grizo pantigana. ZOGO: gnagno cativo.

 

VERZINE: Una sola iera verzine e anca quela gavù un fio! Troverè un cavra co’i corni che ve molerà dopo tre giorni! Per le feste volè prenotar, ma i prezi sarà tropo alti e anca poco de magnar! Resterè a casa con vostro patner! Magnerè paneton riciclà, beverè frizantin svampì, e dopo… AMOR: far l’amor no xe pecato, basta farlo regolato; almeno ‘na volta al’ano! SALUTE: xe quéla che conta! LAVOR: che bruta parolaza: gnanca se i me paga! BORI: xe quéi che conta! Come dir: “Salute e bori e tuto el resto che vadi in malora!” COLOR: verde spinaza! ZOGO: cotecio co’l morto.

 

BALANZA: Bilanzini e bilanzete, se el primo segno che ghe dago in anticipo ‘na bona fine (ano), anca perché le previsioni pe’l prossimo, no xe miga più che tanto meio ben, ma se ve impegnerè, qualcossa de meno pezo ve capiterà! AMOR: se no va, no va; no gave più vinti ani, ma ‘na risoluzion se trova sempre! SALUTE: oltra a quele do picie magagne, e anca se no sentì ben de’n’orecia, no vedè ben de un ocio e ve diol la gamba mariza, pe’l resto dovarè ‘contentarve! LAVOR: cioleve un ano de ‘spetativa! BORI: cioleli fora prima che la banca falissi! COLOR: rosa de sera. ZOGO: no ‘sto mese; in marzo zogarè e vinzerè!

 

SCARPION: Dopo ‘che gaverè fraià per le feste, sarà giusto el momento per meterse in dieta. Ve varderè in specio, anca de traverso, ve pesarè e valuterè voi. AMOR: no profitar; voi conossè i vostri limiti. Omini: la vostra patner sarà ‘ssai  preocupada! Done: el vostro patner sarà ‘ssai preocupà! Doverè risolver quel picio problemin che solo voi savè! SALUTE: misureve la pression prima  de…, per via de’l’infarto. LAVOR: misureve la pression prima de far l’amor, dopo poderia esser tropo tardi! BORI: co’i bori che gavè no cori che ve misure la pression! COLOR: paliduz.  ZOGO: solo in copia!

 

SAGITARIO: Voi se quei che disi: che bale  ‘ste feste, pensando za a carneval a Pasqua a S.Pepi a la festa de la mama, de la zia Pepa; insoma no gaverè mai pase! ‘Ssai feste! E pensar che se in pension tanti ani! Quindi per voi, xe festa ogni giorno! AMOR: voi volessi se podessi, ma xe un picio problemin che ve tormenta! SALUTE: oltre al picio problemin, no ve manca gnente: ongia icarnada, zervicale, brusori in quel posto e spizamento de tempie. LAVOR: gnanca se i ve ciama! BORI: se i ve ciama! COLOR: nero de sepa. ZOGO: tuti quei co la scova. Scova scoverta, scovon sentifico, scova 15…

 

CAVRA COI CORNI: Per ‘ste feste ste zà riordinando le idee e farè anca un pochi de conti! Sarè  ‘ssai bravi a calcolar che con genaio ‘sto governo ve masacrerà de tasse e quindi ve se premunirè! AMOR: anca qua gavè calcolà che: “chi no fuliga l’ultimo de l’ano, no fuliga tuto l’ano!” Voi savè! SALUTE: e dopo ‘ver ‘ssai magnado e ‘ssai ben bevudo, gnanca eurocarbon ve salverà dai dolores de panza per do mesi. LAVOR: de conceto! De corsa in condoto, (basta che no sia ocupà). BORI: noi ve piovi in testa anca se i disi: “piovi sempre sul bagnà!” ZOGO: de compagnia co’l’amante. COLOR: maron scuro.

 

AQUARIO: Quando le feste sarà quasi tute passade, voi ancora ve zercherè! Sveieve, che ve speta un ano pien de impegni! Genaio sarà per voi un mese rico de sorprese, no ve digo se bele o brute, perchè se nò, no ga viz! AMOR: cambierè amante per do mesi e dopo tornerè con vostra molie. La ve zigherà de tuto e voi la cambierè co’n’altra amante. – Ma chi sè? SALUTE: mal come in ‘sto periodo, no stavi mai, ma per fortuna gavè un bravo dotor che con un per de pirole e un poche de suposte de nitroglicerina, ve sistemerà dopo le feste. LAVOR: in bianco de giorno, in blu a righe bianche de nòte. BORI: in banca de Bolafio. COLOR: rosso cinabro. ZOGO: tapedo verde! Se puntè sul 23 nero, perderè tuto quel che gavè vinto.

 

PESSI:Anca se, se i ultimi de tuti i segni, finirè in padela istesso. Dicembre passarà e genaio rivarà. Un consilio: no magnar pessi de mar, solo de scoio, se no se ciavai! In genaio, ve meterè in dieta; magnerè zicoria de Bitonto condì con oio de San Dorligo (no verzine) e brocoleti de Bruschel. AMOR: se no ve ricordarè come che se fa, ciameme (solo per apuntamento), naturalmente. solo done! LAVOR: ve ricordè el primo lavor che se ‘ndai a far de muli? – Mi sò, voi volessi tornar indrio nel tempo, ma no se podè. Godeve la pension e no ‘ste frizer! SALUTE: misureve la pression, magnè in bianco e bevè rosso. BORI: godeve la pension e no ‘ste frizer! COLOR: blu oltremar. ZOGO: buraco venezuelan e anca tombola (quela co’i stropi). No vinzerè una! Sarè fortunai co’l’oto; vinzerè un salamin felin de trentadò cm!!!
Auguri de bon proseguimento a tuti!                

“Xe el reciproco rispeto che rendi durevoli le amicizie”

BONE FESTE a tuti da Fra Chin

Dopo Nadal rivo Mi! Spetemeee…

……………………………………………………………………………………………………………………………………………………………….

 

Febraio – Marzo 2019

‘RIETE: Passade quasi tute le feste se tornai in piena forma e gavè in testa per ‘sto ano tante robete, ma ‘tenti, de no far el passo più longo de la gamba. Per ‘sto carnaval, ve inventerè stranezi co’l patner, ve vestirè de pensionai e tanto per cambiar, ‘ndare in zircolo Rena a festeggiar.  AMOR: se tropo inpulsivi, deve ‘na calmada, no gavè più vinti ani. LAVOR: gavè zà dado, per quel no gavè voia de far un tubo. Gavè ragion! SALUTE: no ste far sforzi fora del bucal per via del nervo sciatico. BORI: dopo le feste ‘ndarè in banca e tirerè fora tuto per via del model ISEE, cussì dimostrerè che no gavè gnanca un. ZOGO: quel che volè.

 

TORO: ‘Ndarè dacordo con la verzine, basta che la sìa verzine. La zercherè, ma no la troverè! Troverè un cancro e ve molerè subito. Gaverè ‘ssai fortuna in tuto, meno che in amor. In lulio qualcossa cambierà. AMOR: raporti sempre più curti, dovè ‘ver pasienza. Vedarè che ‘sto està sarà un poco meio; gavè tempo de prepararve. LAVOR: ormai se quasi come la TAV, no podè lavorar. Godeve la pension e no frizer. SALUTE: qualche aciacco de stagion no ve mancherà anca se gavè fato el vacin, ma ‘tenti però no far sforzi strani; ciolè regolarmente quele venti pirole che ve ga dà el dotor. No bever brignavez e alcolici vari, solo limonada rosè. BORI: paghè un bicer ogni tanto. ZOGO: vinzerè l’8 co’l 66 su Genova.

 

ZEMEI:  se fin deso no ve xe ‘ndada tropo ben dopo carneval ve ‘ndarà pezo; sarà colpa de un leon che gavè conossudo in osmiza: aria e fogo no va dacordo. Per San Pepi troverè sempre in osmiza ‘na balanza: aria e aqua xe compatibili. AMOR: per trovar un patner dovè per forza ‘ndar in osmiza? Ciameme che vegno anca mi! LAVOR: se paroni de’l’osmiza, zoghè in casa! SALUTE: bever fa mal de schena, ga dito un astemio. Ste ‘tenti! I ve ofrirà de far el camerier al Paradiso, ma rifiuterè perché no savè balar. BORI: chi co’l vin se imbriaga, chi co’l vin se li fa. ZOGO: fare ‘na gara: chi che bevi de più, vinzi un litro. No xe più i zoghi de ‘na volta (chi che possa più lontan).

 

CANCRO: cari cancreti per voi do mesi speciali: lavor dirò dopo, e amor anche. Ste contenti cussì e cominciè a far progeti per ‘sto està che sarà lungo e caldo. Dovè agir subito, se nò no combinerè gnente; cossa, savè solo che voi! AMOR: un trionfo totale a fine marzo e dopo fin a giugno, gnente. Ve rifarè in agosto. Troverè una verzine (ma solo de segno) pe’l resto, nisba. Ve rifarè in otobre con un toro. Cavoli vostri! LAVOR: voi volesi far qualcosa per ciapar do lire, ma se zà in cassa disocupazion de quindese ani! Ma quanti ani gavè? SALUTE: prosit! BORI: se ve troverè un lavor gaverè granda possibilità de ciapar do lire. ZOGO: tente el tuto per tuto a la rulot russa.

 

LION: dovè ‘ver tanta pasienza e riverè dovè che volerè rivar (voi savè dove), mi no ve digo perché no son spion. Per San Pepi, andarè in osmiza a San Giusepe, ciaperè ‘na bala, ve ribalterè in prà, ma el giorno dopo, no ve ricorderè più gnente. AMOR: conosserè ‘na persona in zircolo Rena, ve inamorerè de balin, ciaperè ‘na bala, ve ribalterè zò per Via Donota, el giorno dopo no ve ricorderè più gnente. LAVOR: farè ‘na nova esperienza  lavorativa in ‘na cantina e sarè felici e contenti. SALUTE: xe meio che cambiè lavor! BORI: tanto che riverè a la fin del mese.  ZOGO: zogherè a scopa in quindese, voi tegnerè la scova. Sarè ‘ssai fortunai, ma solamente a la fine de april.

 

VERZINE: carissime “verzini” dovè sfrutar tuto quel che più podè: lavor (?), amor (?), ocasioni de ogni tipo, ‘tenti però de no strafar, no gavè più venti ani. Troverè un Toro (segno) che no ve darà pase. AMOR: el Toro gàverà un grando problemin fisico e voi sarè più che contenti, ma ‘tenti al Scarpion! SALUTE: sarè ‘ssai stanchi e ‘ssai mal de schena, per via de quel grando problemin del Toro; ve gavevo avisado de no strafar! Un infiamazion con spizamento ve ciaperà per do giorni, dopo riverà el Scarpion e ve passerà. LAVOR: gnanca sognarse, per via del mal de schena! BORI: ricordeve de pagar el puf, de pagar el bolo scadù in genaio, l’asicurazion su la vita e, se ve riva, do biceri in zircolo Rena. ZOGO: tuti, meno quei co’le man!

 

BALANZA: dopo carneval se zà co’la testa a Pasqua. No gaver furia, prima xe San Pepi (marangon) e andarè in osmiza come ‘na volta. Ciaparè ‘na bala che ve ricorderè fin el giorno dopo, perché voi guante ben la vinaza, ma l’ovo sodo no iera fresco, e alora… AMOR: ‘ssai deludente xe stai ‘sti primi do mesi de ‘sto ano, ma no xe colpa vostra dove ‘meter che gavè ‘na zerta età, ma vedarè, che co’la vostra santa pasienza e co’un picio aiutin, qualcosa sucederà, se no cambie patner!  LAVOR: pensè a chi che xe senza e che fa de tuto per no trovarlo. BORI: pensè a chi no ga gnanca un, e che spera che DiMaio ghe li daghi. Voi gavè bona pension, no gavè poblemi. ZOGO: andarè a Lipiza e punterè tuta la pension su’l rosso, ciaperè un bianco e nero. Tentè co’loto.

 

SCARPION: febraio no xe ‘nda tanto mal, ma marzo sarà un poco più pezo. In april ve saverò dir anca se so zà, che sarà più meio ben che pezo de marzo, meno ben de genaio, ma in agosto sarà meio.Gavè bone idee in glava e ‘sto qua xe el momento bon de sfrutarle. AMOR: gaverè problemi co’la balanza: trigliceridi, mancanza de stimoli, ma co’na coloscopia tornerè sereni e pieni de energia prostratrica. LAVOR: solo in nero finchè no riverà i 780 Euri ch’el governo ve ga promesso e dopo, ‘vanti come prima. SALUTE: za dito ne’l’amor, ma se posso darve ‘ncora un consilio: vardeve in specio e meteve a stecheto. BORI: beati voi che li gavè! ZOGO: vinzerè un ovo de Pasqua; basta che zoghè! Spinaze!

 

SAGITARIO: co’riverà la primavera voi sarè zà pronti come sempre. Ve gavevo ‘visa l’altro ano, me gavè scoltà e quel che gavevi seminà, gavè ingruma. ‘Sto ano, sarà uguale, me par ciaro! Se ‘ssai testardi e anca posessivi, ma rivè sempre dove che volè rivar. Bravi! AMOR: ve piasi cambiar patner ogni do per tre. No gavè meze misure e se qualcosa no ve quadra se ciari e neti! Andè ‘ssai dacordo co i cancri. SALUTE: se no ve dè un cuc, no cambierè più patner. Dieta assoluta dal 29 de febraio fin al primo de marzo. LAVOR: un’ oferta ve riverà da la Foleto, ma voi rifiuterè perché se in pension zà venti ani e no gavè tempo de perder. BORI: magari mi. ZOGO: beati voi che co i bori che gavè e co’l tempo che no gavè de perder, che cambiè patner ogni do per tre, xe meio che no zoghè!

 

CAVRA COI CORNI: ‘sto ano xe comincià quasi ben perché se sempre ‘ssai decisi quando dovè ciapar ‘na decision e se no saressi tanto decisi no combinassi un tubo, ma voi se decisi perché xe l’arma che ve permeti de decider. Me par ciaro! AMOR: nonostante che se sposai de tanti ani, no ve gavè dimenticà gnente. Se sempre decisi in quel che fe anche se la vostra patner ve domanda de esser più decisi, voi ghe rispondè: più deciso de cussì moro.SALUTE: dove deciderve de meterve in dieta: magnar in bianco, no bever bianco e gnanca nero, no magnar in rosso; bevè ‘ssai aqua cussì farè tanta “plin-plin”. LAVOR: solo in nero. BORI: dura ve la vedo con tuti ‘sti aumenti. Meno mal che sarè preselti per i 780 Euri. ZOGO: oltre a le boce, che se ‘ssai portai, zogherè anca i quatro cantoni (per no dimenticarse).

 

AQUARIO: el primo semestre de ‘sto ano istesso no sarà mal, ne la seconda parte inveze farè ‘ssai cambiamenti. Ve dirò più ‘vanti. In Marzo gaverè de risolver un picio problemin per via de un pagamento (puf) no saldado. AMOR: Per quel picio problemin ve gavè lassà con vostro/a patner. Rimedierè andando in zerca de novi amori, ma ciaperè un pochi de bidoni perché voi omini zercavi na verzine e voi done zercavi un toro (come segno zodiacale). Purtopo ‘sti segni no xe combatibili e alora tornerè insieme de novo. SALUTE: ste ‘tenti tra el cinque e sete marzo dove metè i pìe perché se casche xe cavoli vostri. LAVOR: ste ‘tenti de no lavorar ‘sti giorni, magari per sicureza, cioleve ‘spetativa. BORI: se li gavè in banca, cioleli fora prima che qualchedun li cioghi prima de voi. ZOGO: xe meio no risciar.

 

PESSI: ‘Sto ano per voi sarà un ano che mai altri ani xe stai meio de ‘sto ano. Fin qua ghe semo! Solo el domilatredici se ve ricordè, iera pezo. Pe’l prossimo ano, no so dirve se sarà pezo de l’altro ano opur pezo del milenovantanove che istesso no iera tanto pezo del domilatredici. Me par ciaro! AMOR: fin al primo de April la vostra relazion ‘ndarà quasi ben, dopo, no ve digo cossa sucederà, perché se nò, vignì in zerca de mi! SALUTE: a parte l’influensa ‘pena passada perché no gavè volù vazinarve, pe’l resto, fin a fin febraio, no ve’ndarà tanto pezo, a parte la solita ongia incarnada e quel leger spizamento de glava (cossa pensavi) che ve tormenta de un poco de tempo in qua. LAVOR: se in pension da ventizinque ani e ancora sbisighè (cossa, savè solo che voi). BORI: no dir: son un povero pensionà, perché no ve credo. ZOGO: sala corse, e sloche-macine sarà la vostra rovina, o, la vostra fortuna. Vedaremo!

Se no credè…  verifichè!!!

……………………………………………………………………………………………………………………………………………………………….